हिंगोलीत चारा टंचाई रोखण्यासाठी प्रशासनाचे नियोजन

पशुसंवर्धन विभागाने खरीप हंगामात ५० लाख रुपये किमतीचे वैरण बियाणे वितरित केले आहे. आगामी रब्बी हंगामासाठी आणखी दोन कोटी रुपयांच्या चारा बियाण्यांची मागणी करण्यात आली आहे. विदर्भ मराठवाडा दुग्धविकास प्रकल्पाच्या दुसऱ्या टप्प्यातही चारा बियाणे वितरित केले जात आहे. पशुपालकांना चारा बियाणे आणि अनुदानावरील कडबा कुट्टी यंत्रासाठी vmddp.com या संकेतस्थळावर नोंदणी करण्याचे आवाहन करण्यात आले आहे.

पीक अवशेष जाळण्याऐवजी त्यांचा चारा म्हणून वापर करण्यासाठी गावोगावी चारा साक्षरता अभियान राबविण्यात येत आहे. या माध्यमातून पीक अवशेषांवर प्रक्रिया करून सकस पशुखाद्य तयार करणे, चाऱ्याची साठवणूक आणि काटकसरीने वापर करणे याबाबत पशुपालकांना मार्गदर्शन केले जात आहे.

राष्ट्रीय पशुधन अभियानांतर्गत जिल्ह्यात दोन मुरघास प्रकल्प आणि एक टीएमआर प्रकल्प कार्यान्वित झाला आहे. या प्रकल्पांमुळे चाऱ्याची साठवणूक, प्रक्रिया आणि पशुधनासाठी संतुलित खाद्य उपलब्ध करण्यास मदत होणार आहे.

संभाव्य दुष्काळी परिस्थितीत पशुधनाचे संगोपन आणि चाऱ्याची उपलब्धता सुनिश्चित करण्यासाठी प्रशासनाकडून नियोजन करण्यात येत आहे. शेतकरी आणि पशुपालकांनी उपलब्ध चाऱ्याचा काटकसरीने वापर करावा, पीक अवशेषांचा योग्य उपयोग करावा आणि चारा टंचाई निवारणाच्या उपक्रमांत सहभागी व्हावे, असे आवाहन पशुसंवर्धन विभागाने केले आहे.