कारंजा पंचशील नगरमध्ये मृत्यूचा थरार; हल्ल्यात तरुणाचा मृत्यू, तीन आरोपी फरार

कारंजा (दि. १७ मे २०२६) :

कारंजा येथील पंचशील नगर परिसरात घडलेल्या एका धक्कादायक घटनेत विष्णू गणराज यांचा उपचारादरम्यान मृत्यू झाला. मिळालेल्या माहितीनुसार, सविता गणराज या महिलेसोबत छेडछाड होत असताना त्यांना वाचवण्यासाठी विष्णू गणराज पुढे गेले.

यावेळी किशोर गणराज यांनी स्लॅबवरून विटा फेकून मारल्याचा आरोप आहे. त्यातील एक वीट विष्णू गणराज यांच्या डोक्याला लागल्याने ते गंभीर जखमी झाले. त्यांना तातडीने रुग्णालयात दाखल करण्यात आले; मात्र उपचारादरम्यान त्यांचा मृत्यू झाला.

या घटनेनंतर मृताच्या कुटुंबावर मोठे संकट कोसळले असून, आरोपींवर कठोर कारवाई करण्याची मागणी कुटुंबीयांकडून करण्यात येत आहे. पीडित कुटुंबाच्या म्हणण्यानुसार, तक्रारीत चार आरोपींची नावे देण्यात आली असताना अहवालात केवळ दोन नावांचा उल्लेख करण्यात आल्याने त्यांच्या चिंतेत भर पडली आहे.

या प्रकरणातील चार आरोपींपैकी एका आरोपीला अटक करण्यात आली असून, उर्वरित तीन आरोपी अद्याप फरार असल्याचा दावा कुटुंबीयांनी केला आहे. फरार आरोपींकडून पुन्हा धोका निर्माण होऊ शकतो, अशी भीती व्यक्त करत त्यांनी पोलीस प्रशासनाकडे तातडीने सर्व आरोपींना अटक करून कुटुंबाला संरक्षण देण्याची मागणी केली आहे.

पीडित कुटुंबाला न्याय मिळावा आणि फरार आरोपींवर लवकरात लवकर कारवाई व्हावी, अशी मागणी नागरिकांकडूनही होत आहे.