संतश्रेष्ठ तुकाराम महाराज बीज सोहळ्यानिमित्त देहू परिसरातील वाहतुकीत बदल

पिंपरी :-संतश्रेष्ठ श्री तुकाराम महाराज बीजसोहळा रविवारी (दि.१६) साजरा होत आहे. त्यानिमित्त राज्यभरातून मोठ्या संख्येने भाविक देहू येथे येतात. त्यामुळे होणाऱ्या वाहनांच्या गर्दीमुळे भाविकांची गैरसोय टाळण्यासाठी देहू आणि परिसरातील वाहतुकीत बदल करण्यात आला आहे. याबाबतचे आदेश वाहतूक शाखेचे पोलिस उपायुक्त बापू बांगर यांनी दिले आहेत.
जुना पुणे-मुंबई महामार्गावरील देहूगाव कमान येथून देहूगावकडे येणाऱ्या सार्वजनिक वाहतूकसेवा आणि दिंडीतील वाहनांसाठी मार्ग खुला राहणार असला तरी खासगी वाहनांना रस्ता बंद राहील.
महिंद्रा सर्कलकडून फिजुत्सु कॉर्नर अथवा कैनबे चौक, आयटी पार्क चौकाकडे जाता येणार नाही. या मार्गावरील वाहने महिंद्रा सर्कल, निघोजे, मोईफाटा, डायमंड चौकमार्गे प्रवास करू शकतील.
तळेगाव-चाकण रोडवरील देहूफाटा येथून देहूगाव येथे जाणारा मार्ग बंद असेल त्या भागातील वाहने एचपी चौक मार्गे वळवली जातील.
देहू कमान, १४ टाळकरी कमान, इंद्रायणी पुल, हॉटेल कॉर्नर दरम्यानचा रस्ता आणि १४ टाळकरी कमान ते भैरवनाथ चौक दरम्यानचा मार्ग तसेच खंडेलवाल चौक ते देहू कमान (मुख्य) हा रस्ता वाहतुकीसाठी बंद असेल.
जुना पालखी मार्ग (कंद पाटील चौक) ते झेंडे मळा (जकात नाका) हा मार्ग वन वे राहणार आहे.