विमुक्त जाती दिनानिमित्त ३१ ऑगस्टला पुण्यात राज्यस्तरीय कार्यक्रम

पुणे, दि. २८ : विमुक्त जाती दिनाचे औचित्य साधून महाराष्ट्र शासनाच्या इतर मागास बहुजन कल्याण संचालनालयाच्या वतीने पुण्यात राज्यस्तरीय कार्यक्रमाचे आयोजन करण्यात आले आहे. राज्यपाल जिष्णु देव वर्मा यांच्या प्रमुख उपस्थितीत हा कार्यक्रम सोमवार, ३१ ऑगस्ट रोजी सकाळी १० वाजता फर्ग्युसन महाविद्यालयाच्या अॅम्फी थिएटरमध्ये होणार आहे.

ब्रिटिश काळात क्रिमिनल ट्राइब्ज अॅक्टच्या माध्यमातून काही जाती आणि जमातींवर गुन्हेगार असल्याचा शिक्का मारण्यात आला होता. स्वातंत्र्यानंतर ३१ ऑगस्ट १९५२ रोजी या जाती जमातींना या कलंकातून मुक्त करण्यात आले आणि त्यांना विमुक्त जाती म्हणून मान्यता देण्यात आली. या ऐतिहासिक घटनेच्या स्मरणार्थ दरवर्षी ३१ ऑगस्ट हा दिवस विमुक्त जाती दिन म्हणून पाळला जातो.

राज्यस्तरीय कार्यक्रमाला इतर मागास बहुजन कल्याण मंत्री अतुल सावे यांच्यासह विभागातील वरिष्ठ अधिकारी उपस्थित राहणार आहेत. विमुक्त जाती आणि भटक्या जमातींच्या सामाजिक, शैक्षणिक तसेच आर्थिक प्रगतीसाठी शासनाकडून राबविण्यात येणाऱ्या विविध योजना आणि उपक्रमांची माहिती कार्यक्रमादरम्यान देण्यात येणार आहे.

विमुक्त जाती आणि भटक्या जमातींच्या विकासासाठी शासनाच्या विविध योजनांचा लाभ संबंधित घटकांपर्यंत प्रभावीपणे पोहोचविण्याच्या दृष्टीने या कार्यक्रमाला विशेष महत्त्व आहे. अशी माहिती इतर मागास बहुजन कल्याण विभागाच्या संचालक सोनाली मुळे यांनी दिली.