पद बदलले तरी कार्यकर्त्याची ओळख कायम, सामान्य माणसाशी संपर्क हाच आधार

मुंबई, दि. १० : राजकारणातील पद आणि जबाबदाऱ्या बदलल्या तरी सामान्य माणसाशी असलेला थेट संपर्क आणि कार्यकर्त्याची भूमिका कायम असल्याचे प्रतिपादन उपमुख्यमंत्री एकनाथ शिंदे यांनी केले. इंडिया टुडे कॉन्क्लेव्हमध्ये बोलताना त्यांनी सामान्य माणसाच्या प्रश्नांना प्राधान्य देणारी आपली कार्यपद्धती स्पष्ट केली.

कॉमन मॅन सीएमपासून डेडिकेटेड टू कॉमन मॅनपर्यंतचा प्रवास मांडताना शिंदे यांनी फेसबुक लाईव्हपेक्षा फेस टू फेस संवादावर भर दिला. नागरिकांच्या अडचणी समजून घेण्यासाठी रात्री उशिरापर्यंत त्यांच्याशी संवाद साधणे आणि गरज पडल्यास थेट घटनास्थळी पोहोचणे, हा आपल्या कामाचा मंत्र असल्याचे त्यांनी सांगितले. धर्मवीर आनंद दिघे यांच्या संस्कारातून ही कार्यशैली विकसित झाल्याचेही त्यांनी नमूद केले.

पाहलगाम येथील संकटाच्या वेळी महाराष्ट्रातील नागरिकांना सुरक्षित परत आणण्यासाठी पाच विमानांची व्यवस्था केल्याचा उल्लेख करत त्यांनी संकटाच्या काळात नागरिकांच्या मदतीला धावून जाण्याची भूमिका स्पष्ट केली. लोकांना सोडून पळून जाण्याऐवजी त्यांना परत आणण्यासाठी पुढाकार घेणे महत्त्वाचे असल्याचे त्यांनी सांगितले.

शेतकरी आत्महत्या, दुष्काळ आणि शेतकऱ्यांना आर्थिक मदत या प्रश्नांवर बोलताना केंद्र सरकारकडे मदतीची मागणी तसेच राज्य सरकारच्या उपाययोजनांचा त्यांनी उल्लेख केला. शेतकऱ्यांच्या प्रश्नांमध्ये राजकारण करण्यापेक्षा त्यांना प्रत्यक्ष मदत मिळणे महत्त्वाचे असल्याचे त्यांनी स्पष्ट केले.

एमपीएससीसह युवकांच्या विविध प्रश्नांवर आंदोलन करणे हा लोकशाहीने दिलेला अधिकार असल्याचे शिंदे यांनी मान्य केले. मात्र, युवकांच्या आंदोलनाचा राजकीय फायद्यासाठी वापर होऊ नये, असे मत त्यांनी व्यक्त केले. मराठा आंदोलनादरम्यान आंदोलकांशी प्रत्यक्ष संवाद साधल्याचाही त्यांनी उल्लेख केला. मतदार यादी आणि मतदानातील कथित गैरप्रकारांच्या आरोपांवरही कॉन्क्लेव्हमध्ये चर्चा झाली.

कॉकरोच जनता पार्टीच्या आंदोलनाचा उल्लेख करताना त्यांनी आंदोलनाचा अधिकार आणि त्यामागील राजकीय हेतू यांत फरक असल्याचे सांगितले. युवकांच्या प्रश्नांवर आंदोलन होणे आणि त्याचा वापर राजकीय अजेंडा पुढे नेण्यासाठी करणे या वेगळ्या बाबी असल्याचे त्यांनी नमूद केले.

राज्यातील पायाभूत सुविधांच्या विकासावर भाष्य करताना मुंबई कोस्टल रोड, अटल सेतू, समृद्धी महामार्ग, मिसिंग लिंक, मेट्रो प्रकल्प, बोरीवली ठाणे बोगदा आणि भाईंदर विरारसह विविध प्रकल्पांचा उल्लेख केला. कनेक्टिव्हिटी मजबूत झाल्यास उद्योग, रोजगार आणि आर्थिक विकासाला चालना मिळेल, असे त्यांनी सांगितले.

नवी मुंबई विमानतळाच्या परिसरात एरोसिटी, मेडिसिटी, स्पोर्ट्स सिटी, जेएनपीटी आणि लॉजिस्टिक्स सुविधांच्या विकासाची भूमिका त्यांनी मांडली. तसेच महालक्ष्मी रेसकोर्सची सुमारे १२५ एकर आणि कोस्टल रोडलगतची सुमारे १५० एकर जागा एकत्र करून सुमारे ३०० एकरांचे सेंट्रल पार्क विकसित करण्याची संकल्पना त्यांनी मांडली. या प्रकल्पात रिअल इस्टेटचा हस्तक्षेप नसल्याचेही त्यांनी स्पष्ट केले.

मुख्यमंत्री देवेंद्र फडणवीस यांच्यासोबत टीम म्हणून काम करत असल्याचे सांगत शिंदे यांनी महायुतीतील समन्वयावर भर दिला. महाराष्ट्राच्या विकासासाठी केंद्र आणि राज्य सरकारच्या सहकार्याचे महत्त्वही त्यांनी अधोरेखित केले. शिवसेनेच्या सेवा संकल्प उपक्रमासह विविध राजकीय आणि विकासात्मक मुद्द्यांवर त्यांनी भूमिका मांडली.

शिवसेनेच्या वैधतेच्या प्रश्नावर बोलताना ६० आमदारांचा जनादेश महत्त्वाचा असल्याचे त्यांनी सांगितले. अंतिम निर्णय जनता घेत असते, असेही ते म्हणाले. भविष्यातील मुख्यमंत्रीपदाबाबत विचारले असता त्यांनी भविष्य सांगेल, असे उत्तर दिले.

एकूणच, पदापेक्षा जनसेवा, कार्यकर्त्याची ओळख आणि सामान्य माणसाशी थेट संपर्क यांना प्राधान्य देत विकासकामांच्या माध्यमातून जनतेचा विश्वास संपादन करण्याचा संदेश एकनाथ शिंदे यांनी इंडिया टुडे कॉन्क्लेव्हमधून दिला.