इचलकरंजीत सेवा संकल्प अभियानांतर्गत वृक्षारोपण

इचलकरंजी, दि. १२ ऑक्टोबर इचलकरंजी  महानगरपालिकेच्या वतीने सेवा संकल्प अभियानांतर्गत पर्यावरण संवर्धन, हरित क्षेत्रवाढ आणि वृक्षसंवर्धनाबाबत जनजागृती करण्याच्या उद्देशाने संत ज्ञानेश्वर उद्यान येथे वृक्षारोपण कार्यक्रमाचे आयोजन करण्यात आले. सोमवारी १२ ऑक्टोबर रोजी महानगरपालिकेच्या उद्यान विभागाच्या पुढाकाराने हा उपक्रम उत्साहात पार पडला.

या कार्यक्रमास महानगरपालिका आयुक्त पल्लवी पाटील, अतिरिक्त आयुक्त सुषमा शिंदे, स्थायी समिती सभापती सतीश मुळीक, परिवहन समिती सभापती अरुणा बचाटे, प्रभाग समिती सभापती सुशांत कलागते आणि प्रमोद बचाटे यांची प्रमुख उपस्थिती होती.

सेवा संकल्प अभियानांतर्गत शहराच्या सर्वांगीण विकासासोबतच पर्यावरणाचे संरक्षण आणि संवर्धन करण्यावर महानगरपालिका प्रशासनाकडून भर देण्यात येत आहे. संत ज्ञानेश्वर उद्यान परिसरात वृक्षारोपण करून शहर अधिक स्वच्छ, सुंदर आणि हरित करण्याचा संदेश या उपक्रमातून देण्यात आला.

वाढते शहरीकरण, तापमानातील वाढ आणि प्रदूषणाच्या पार्श्वभूमीवर वृक्षारोपण व वृक्षसंवर्धनाचे महत्त्व वाढले आहे. वृक्षांमुळे पर्यावरणाचा समतोल राखण्यास, हवेची गुणवत्ता सुधारण्यास आणि जैवविविधतेचे संरक्षण करण्यास मदत होते. त्यामुळे शहरातील उद्याने, मोकळ्या जागा आणि सार्वजनिक परिसरात वृक्षारोपणाला प्रोत्साहन देण्याची गरज आहे.

केवळ वृक्षारोपण न करता लावलेल्या रोपांचे नियमित संगोपन, पाणीपुरवठा, संरक्षण आणि देखभाल करणे आवश्यक असल्याचे या उपक्रमातून अधोरेखित करण्यात आले. वृक्षांचे मोठ्या झाडांमध्ये रूपांतर होण्यासाठी सातत्याने प्रयत्न करण्याचे महत्त्वही यावेळी स्पष्ट करण्यात आले.

शहरातील हरित क्षेत्र वाढविणे, उद्यानांचे सौंदर्यीकरण करणे आणि भावी पिढ्यांसाठी निसर्गसंपन्न शहर निर्माण करण्याच्या दृष्टीने महानगरपालिकेकडून विविध पर्यावरणपूरक उपक्रम राबविण्यात येत आहेत. नागरिकांनीही आपल्या घराच्या परिसरात आणि उपलब्ध सार्वजनिक जागांवर वृक्षारोपण करून त्यांचे संगोपन करावे, असे आवाहन महानगरपालिका प्रशासनाच्या वतीने करण्यात आले.

हरित इचलकरंजी, स्वच्छ इचलकरंजी आणि सुंदर इचलकरंजी ही संकल्पना प्रत्यक्षात साकार करण्यासाठी नागरिकांचा सक्रिय सहभाग महत्त्वाचा असून, पर्यावरण संवर्धन ही प्रत्येकाची सामूहिक जबाबदारी असल्याचा संदेश या कार्यक्रमातून देण्यात आला.

यावेळी सहायक आयुक्त रामचंद्र कांबळे, नगरसचिव राहुल पोटे, क्रीडा अधिकारी संजय शेटे, उद्यान व वनसंवर्धन विभागप्रमुख प्रशांत आरगे, भांडार अधीक्षक गणेश शिंदे, संदीप जोशी, संगणक विभागप्रमुख अजय जाधव, स्वच्छता निरीक्षक करण लाखे, उद्यान पर्यवेक्षक अनिकेत शिलेदार, भूषण टवलारे, आयुब शेख, संजय कांबळे, सुमिच्छा सूर्यवंशी, महेश बुचडे, दिलीप मगदुम यांच्यासह महानगरपालिकेचे अधिकारी व कर्मचारी उपस्थित होते.