साथरोग- किटकजन्य आजार टाळण्याकरिता काळजी घ्या : आयुक्त श्री.मंगेश चितळे यांचे नागरिकांना आवाहन
ksnews
0
29
हिवताप प्रतिरोध महिन्यांतर्गत जनजागृती
पनवेले,दि.8 : सध्या जोरदार पाऊस सुरू असून या दिवसांमध्ये डासांचे प्रमाण वाढत असते. त्यामुळे हिवताप, डेंगू ,मलेरिया सारख्या साथजन्य रोग होण्याची शक्यता असते. या पार्श्वभूमीवरती वैद्यकिय आरोग्य विभागामार्फत किटकजन्य आजराविषयी खबरदारी घेण्यासाठी वैद्यकिय आरोग्य विभागामार्फत विविध माध्यमांतून जनजागृती करण्यात येत आहे. महापालिकेने दिलेल्या सूचनांचे पालन करुन नागरिकांनी पुरेशी घ्यावी असे आवाहन आयुक्त तथा प्रशासक मंगेश चितळे यांनी केले आहे.
सध्या महापालिकेच्या वैद्यकिय आरोग्य विभागाच्यावतीने "हिवताप प्रतिरोध महिना" साजरा करण्यात येत आहे. या अंतर्गत शाळा, घरोघरी जाऊन, आरोग्य केंद्राच्या आसपासचा परिसर, बाजारपेठा, सोसायट्यांमध्ये हिवतापाची लक्षणे, उपचार व हिवताप प्रतिरोध अंतर्गत विविध उपाययोजनांची माहिती देण्यात येत आहे.
पावसाळ्यात विविध किटकजन्य रोगाचे प्रमाण वाढत असते. अशा वेळी नागरिकांनी पिण्याचे पाणी उकळून प्यावे. तसेच भाज्या,फळे इत्यादी वस्तू स्वच्छ धुवून मगच खाण्यासाठी वापराव्यात. सर्व केरकचरा घंटा गाडीतच टाकावा. घर व सभोवतालचा परिसर जास्तीत जास्त स्वच्छ ठेवावा. आपल्या इमारतीतील पाण्याची टाकी निर्जंतुक करावी. साचलेले पाणी ,डबकी यातील पाणी वाट काढून वाहून जाईल अशी सोय करावी जेणे करून डास उत्पन्न होणार नाहीत. शिळे व उघड्यावरचे अन्न खाऊ नये, विहरीचे पाणी शुध्दीकरण करूनच पिण्यास वापरावे. अतिसार झाल्यास क्षार संजिवनी मिश्रणाचा वापर करावा. घरांतर्गत डास उत्पत्तीस्थाने टाळण्यासाठी घरातील फुलदाणी मनीप्लँट,वॉटरकूलर इत्यादीमधील पाणी आठवड्यातून एक दिवस पुर्णपणे काढून कोरडे करून ‘कोरडा दिवस’ पाळावा, अशा सूचना वैद्यकिय आरोग्य विभागाचे मुख्य वैद्यकिय अधिकारी डॉ. आनंद गोसावी यांनी केले आहे.
जेवणापूर्वी व शौचास जाऊन आल्यानंतर हात साबणाने स्वच्छ धुणे, पुर्ण शिजवेले,ताजे अन्न खावे, रस्त्यांवरील उघडे अन्नपदार्थ खावू नये. ताप सर्दी, खोकला अशा प्रकारची लक्षणेअसल्यास नजिकच्या नागरी प्राथमिक आरोग्य केंद्राशी संपर्क साधावा.
हिवताप,डेंगू, मेंदूज्वर, चिकनगुनिया,मलेरिया असे साथीचे रूग्ण आपल्या आसपास आढल्यास जवळच्या नागरी प्राथमिक आरोग्य केंद्राशी किंवा रूग्णालयाशी संपर्क साधावा. रूग्णालयांनी, प्रयोगशाळांनी साथीच्या रोगाचे रूग्ण महापालिकेला idsppanvelcorporation@gmail.com या ईमेलआयडीवरती कळवावे असे आवाहन वैद्यकिय आरोग्य विभागाच्यावतीने करण्यात आले आहे.
